Үкімет дағдарысқа қарсы шұғыл шараларды қолға алғанын жариялады

Қазақстан үкіметі «экономикалық реформалардың жағымсыз салдарын азайту үшін» шұғыл шаралар қабылдайтынын мәлімдеді. Шұғыл шаралар арасында ипотекалық несие бөлуді ұлғайту, жанармай бағасын, коммуналдық төлем тарифтерін көтеруге мораторий, көлікті лизингке алу механизмі және салық режиміне қатысты шаралар бар. Бұл жөнінде 16 қазанда өткен үкімет отырысында хабарланды. Үкімет бүгіннен бастап «инфляция деңгейі тұрақтанғанға дейін» АИ-92 маркалы бензин мен дизель отыны бағасын одан әрі көтеруге мораторий енгізді. Премьер-министр тиісті органдарға мұның орындалуын қадағалауды тапсырды. Бұған қоса үкімет коммуналдық қызмет тарифтерін көтеруді 2026 жылдың І тоқсанының соңына дейін тоқтатуға тапсырма берді. Бұдан бөлек Қазақстан үкіметі оңайлатылған декларация негізіндегі арнайы салық режимін қолдануға салынатын «басы артық шектеулерді алып тастайтынын», салық бойынша тексеру жүргізуге тыйым салатынын, салық берешегі қарызы үшін айыппұл болмайтынын мәлімдеді. Үкімет мемлекеттік бағдарламамен берілетін ипотекалық несие көлемін «екі есе ұлғайтатынын», «Наурыз» және «Наурыз-Жұмыскер» бағдарламалары арқылы несиелеу көлемін 500 млрд теңгеге дейін ұлғайтатынын хабарлады. Мұның алдында Ұлттық банк базалық мөлшерлемені 18 пайызға көтеріп, соның салдарынан банктер ипотека беруді тоқтатуы мүмкін деген ақпарат болған. Мұнымен бірге үкімет азаматтардың автокөлікті лизингке алу механизмін енгізбек.

Read on the original site